日本尊尼組合關8成員派出成員橫山裕、錦戶亮同大倉忠義今午到訪台灣，宣傳下周五在台發行嘅精選碟，同時力谷9月22日、23日在台北小巨蛋嘅關8首個海外騷。

三人一落機就努力練中文、台語，但記者會自我介紹時仍要靠「貓紙」睇住場內嘅大字報致詞。相隔兩個月再訪台嘅錦戶亮，用中文話：「大家好，我是錦戶亮，很開心可以這麼快再來台灣。」佢又提到噚日發生大阪大地震，感謝總統蔡英文於Twitter送上慰問及準備提供援助：「身為大阪人，在此致上萬分的謝意，謝謝！」

三位成員話地震時正於東京工作，慶幸喺大阪嘅家人、朋友都平安，錦戶亮話：「我們以前都經歷過阪神大震災，看到昨天大阪人又因為地震陷入不安，真的很心痛，希望可以盡自己的力量幫忙。」

除咗橫山裕、錦戶亮同大倉忠義、原本唔喺訪台名單中嘅成員丸山隆平、安田章大被發現亦隨行赴台，村上信五今午亦會從俄羅斯趕到台灣，據指6名成員喺台灣係順道為節目取景。

精選娛聞，喺晒《娛果》
http://fb.com/appledailyent