講完悲觀，唔敢撈底，點知恒指在十二月八日就暴升1198點，衝破萬五點達到15044點，升到你唔信，一聲唉吔吔，又錯失反彈良機，不過一位美國大淡友都話過標普五百指數已跌到殘，可以反彈三成，入貨訊號已至。但佢立即加多一句：反彈後繼續下滑尋底！唔緊貼市道者，小心啲至好。
Ｙ教授退休幾年，Ｙ太太去年又自特區政府退休，仔女全部在外國，二人世界你話做乜好？於是久唔久就約啲舊日學生見面，打到電話嚟，說係老師請食飯，學生焉敢不從，當然如期赴約去佢嘅飯堂力寶軒。Ｙ教授係潮州人，家住半山，最近嗰間潮州菜館就係力寶軒嘞，故此請食飯就係去嗰度。
Ｙ教授老馬有火，最近寫咗兩篇文章，一篇在《新亞生活》月刊發表者，講述一般觀察中國經濟常犯之錯誤，不點名批評一啲人，我哋睇慣全港報紙雜誌嘅，一睇就知佢所指何事。佢觀察研究中國四十餘年，大學畢業後到德國讀博士，研究馬克思及比較經濟制度，孜孜不倦，發表論文就用英文，在《ChinaQuarterly》刊登過唔少，在德國演講就用德文，想唔到佢用丟低好耐嘅中文為文，啲文筆會咁好嘅，左丁山對老師寫個服字。Ｙ教授話：「生疏晒咯，執筆忘字㖭，不過我哋嗰代人讀得古文多，寫咗一兩篇，支筆就順番晒。」

係嘅係嘅，長者教授輩揸起枝筆，人人都有咁上下，唔似得一啲年青自稱知識分子嘅新進，無論寫長文或者短句，都令左丁山睇到一頭煙，但佢哋又好有自信噃，一位對報紙講佢用英語寫嘅博士論文講哲學，全世界冇十個人睇得明，另一位就在報紙講佢已經習慣咗香港人聽不懂他在說甚麼。人哋咁鬼高深，左丁山為之退避三舍，諗起好多年前到半島酒店訪問佛利民，大師講經濟學講到好似幼稚園課程咁淺白，令到左丁山自以為自己ＩＱ好高㖭。佛利民識唔識扮高深呢？當然識啦，但真正大師點會話自己已習慣別人聽不明白他說甚麼？左丁山對Ｙ教授講：「既然已自學術界退休，不如就用中文寫多啲中國經濟，益吓後一輩都好吖？」