重遊兒時舊地別具意義
球驗客手記:碧咸著新波砵轉運

蘋果日報 2004/04/28 00:00


中國人當黑就轉風車轉運,但效力皇馬嘅英格蘭中場碧咸想轉運就唔係靠風車,而係對新波砵。
碧咸近排真係黑過墨斗,除咗俾人話佢陀衰家令皇馬喺歐冠盃出局同喺西甲聯唔見咗個榜首位之外,重俾英國傳媒踢爆背住老婆維多莉亞偷食。咁啱喺前日,碧咸返英國為佢自己對三間牌銀紅色專用波砵進行宣傳活動,所謂人逢喜事精神爽,睇嚟碧咸應該有救啦!
碧咸發布新波砵嘅地方,原來就係佢父母買第一對波砵畀佢嘅舖頭;咁即係話,碧咸想將之前唔開心同唔如意嘅嘢抹走,由頭嚟過。
我求大俠更收到風,話碧咸會着呢對新砵仔踢禮拜六作客拉科場西甲聯。記得喺上場對皇馬,碧咸喺射完一個罰球跣咗落地,場面不知幾咁尷尬,搞到隊友卡洛斯過嚟扶佢起身。聽聞呢對砵係三間幫碧咸度身定做,如果碧咸再仆,睇怕要諗諗轉牌子。

查斯古特勢離祖記西班牙女伴作梗
祖雲達斯前鋒查斯古特重未同球會續新約,呢個夏天隨時轉投西班牙球會。會長莫治對此顯得有啲失望,重苦笑話以後嚴禁麾下球員結交西班牙籍女友!點解?當日施丹離隊過檔皇馬,以及今次查斯古特喊走人,多少都係受到佢哋嘅西班牙籍老婆及女友「唆擺」有關囉!
傳兵工廠斟泰利蘇甘保搵最佳拍檔
阿仙奴後衞蘇甘保季中喪父,曾因此盟放棄足球嘅念頭。我求大俠見佢𠵱家能重新振作,幫球隊重奪超聯冠軍,都好欣賞。盛傳阿仙奴準備斟利物浦中場謝拉特及車路士後衞泰利,我就覺得後者作用大啲,話晒中場已有韋拉及伊度等工兵,搵泰利幫輕蘇甘保嘅工作就重實際!

車仔不惜眼前人科素再外借伯明翰
車路士油王班主阿巴莫域治成日話要買呢個買嗰個,但有個近在眼前嘅好球員,就唔識用。佢咪就係前鋒科素!科素今屆被外借到伯明翰,表現有板有眼,喺聯賽入咗十七球,多過車仔嘅前鋒哈索賓基、梅度、基斯普同埋古莊臣。不過,車仔竟同意再將佢借多季畀伯明翰,吹脹!

心繫祖家傳過檔堅尼同愛爾蘭無緣
闊別國際賽一段日子嘅愛爾蘭中場堅尼同埋墨西哥前鋒白蘭高,啱啱宣布復出踢國際賽,就因傷唔可以喺今日同球迷見面。堅尼踢唔到,最開心梗係曼聯領隊費格遜,因佢一直反對堅尼返國家隊;亦因為咁,有傳堅尼想過檔些路迪;但過檔嘅嘢唔係你話過就過,要雙方領隊制先得。