韓國「國民MC」劉在錫早前已宣佈會跟男團EXO有合作計劃，當時粉絲以為只係上節目合作跳吓舞唱吓歌，不過原來劉在錫係好認真㗎，就係參與EXO嘅巡迴演唱會海外埸！

EXO將於下周六開始、以泰國曼谷為世界巡迴演唱會海外場嘅首站，而今日就爆出消息指劉在錫跟EXO會於曼谷公開合作舞台，劉在錫目前亦正非常認真地進行練習，會於舞台上演繹新嘅編舞。

而EXO所屬嘅SM事務所今日亦回應：「劉在錫確實將登上EXO曼谷演唱會嘅舞台。」國民MC今次去海外出騷，一定會於當地掀起追星熱。