韓國大熱綜藝節目《超人回來了》嘅格鬥選手秋成勳嘅寶貝女秋小愛，一向都擁有唔少粉絲，平日小愛最鍾意做啲古靈精怪嘅表情，引人發笑。估唔到小愛盡得父親真傳，操得一身好體能。

如果有睇開《超人回來了》都知道小愛人仔細細但係好擦得，食嘢食唔停，真係好有食福。雖然小愛成日食嘢，但係佢都冇偷懶唔做運動，噚日喺小愛嘅官方Facebook就上傳佢張新相，相中小愛嘅臂力認真驚人，佢竟然玩緊吊環，用一對小小嘅手臂支撐住自己嘅身體，雖然個動作咁難度高，但小愛都冇話表現好辛苦，仲全程笑容滿臉呢。

另外，同樣擁有寶貝女嘅車勝元，雖然忙於同劉海鎮孫浩俊演出綜藝節目《一日三餐》，但係車勝元呢位好爸爸一向都非常重視家庭生活，即使工作幾忙都好，家庭永遠都放第一位，佢上個月仲趁抽空與妻子齊齊現身女兒嘅小學畢業典禮，呢位爸爸認真唔話得。