35歲嘅吳建豪今日於七夕中國情人節，發聲明宣佈結婚喜訊、同富家女友石貞善（ArissaCheo）已於8月9日按新加坡法律提出結婚申請。

剛於上周三度過35歲嘅吳建豪，靜雞雞喺新加坡同女友慶祝生日嘅兩天之後，即選擇新加坡國慶日申請註冊成為獅城女婿。今日傍晚吳建豪由香港飛返台北，上機前於微博公告婚訊：「我衝動了！神祝福大家Godbless。」並發放一張兩人童年嘅合成相。

吳建豪接受訪問時話：「結緍需要衝動，上周是我生日，結婚當做給自己的禮物，七夕公佈也是很浪漫的時機。」其前緋聞女友徐若瑄祝一對新人白頭到老，好友柯震東都留言恭喜：「我要當花童。」

日前吳建豪到非洲探訪時更帶女友同行預支蜜月，吳建豪又曾表示，信基督後承諾會為上帝守貞「關機」、即婚後才有性行為，故此外間都好「緊張」到底吳建豪曳曳咗未。今晚佢由香港返抵台灣，女友未隨行，一身紅衣嘅吳建豪心情甚好，笑晒謂：「今天是情人節才選在這時候公開，相信我的粉絲都很祝福我。」問到是否先「有」後婚(奉子成婚)？佢話：「我是基督徒，不可能！」

再問吳建豪是否已於8月9號、即提出結婚申請當日「開機」？佢就笑笑口道：「你很色耶！」笑而不答。