韓國Mnet推出嘅新一季選秀節目《PRODUCE 48》，跟日本AKB48合作，於96名練習生中選出12人出道，節目將於15日首播，一眾練習生及主持李昇基、導師李洪基、昭宥等人今日就出席於首爾江南舉行嘅記者會。

導演表示，是次選拔方式冇太大變化，跟國籍無關，冇配額制，會揀出最受喜愛嘅12名練習生出道。對於投票只於韓國進行，導演表示：「雖然係韓、日同時播出，但係投票系統只於韓國進行，當中有多種理由。AKB組合於日本擁有壓倒性嘅人氣，韓國練習生跟佢哋競爭會有好大差異，為咗大家都係由零開始，決定只於韓國接受投票。」

另外，早前有韓國網民不滿AKB48曾捲入美化戰爭嘅爭議，指AKB48係右翼分子，導演表示：「節目嘅企劃背景並唔係特定於韓國同日本，而係來自亞洲或全球，夢想成為偶像嘅朋友聚集埋一齊，係關於夢想、友情以及成長嘅故事，希望唔好睇成韓國跟日本嘅鬥爭。」強調節目並冇政治理念。

更多韓流，喺晒《娛果》
http://fb.com/appledailyent