【懷念陳百強】Danny胞兄贈亡弟私家凳電子琴予歌迷:送俾一定會珍惜嘅人
60歲冥壽陳百強歌迷
「生活靜靜似是湖水,全為你泛起生氣;全為你泛起了漣漪,歡笑全為你起……」每當想起陳百強(Danny),就會想到他最愛的紫色,想起他一首又一首動人入心的經典歌,當中少不了由其譜曲的《漣漪》。
今年9月7日是Danny的60歲冥壽,生於1958年的他,擁有帥氣外形及風度翩翩的氣質,推出首張專輯《眼淚為你流》便一炮而紅,有「情歌王子」之稱,可惜他在92年5月18日被發現於寓所昏迷,送院搶救後,最終昏迷一年半,在93年10月25日與世長辭。
雖然Danny已經離開了25年,但一眾紫迷至今未有忘記這位偶像,由03年至今,每年都會舉行聚會悼念他,風雨不改,今年亦不例外,尤其今年是Danny的60歲冥壽,對紫迷來說更具意義。歌迷會會長Liza,日前約同幾位Danny迷,在其位於西環家中接受《蘋果》訪問,今次之所以要登堂入室,全因Liza家中收藏了兩件屬於Danny生前的「寶物」。
兩件寶物,分別是Danny生前用來練習的一台電子琴,雖然琴已經壞掉,亦沒有零件可以更換,但對Liza而言,這個電子琴無比珍貴。而另一件屬於Danny的物品,就是一張悠閒座椅。說到這兩件物品輾轉去她手上嘅過程,Liza笑說過程不算複雜:「就係Danny哥哥俾我嘅!因為其實兩件物品都幾大件,如果要特登搵一個地方收藏,Danny哥哥就認為送俾一定會珍惜嘅人更加好,就當係我幫佢哋keep住先啦!」
除了支持Danny 40年的Liza,受訪歌迷還有81年睇《畢業生》而鍾意Danny的Tak Tak、支持Danny 30年的Betty,而Betty的12歲兒子Hayward亦受媽咪影響聽Danny的歌,學彈琴的他更特別叫老師教他彈《漣漪》,令老師都覺得驚訝。
另外還有跟Liza一樣支持Danny 40年的阿儀,當年有追星的她,話每次見Danny都好緊張。阿儀話:「因為知道佢好文靜,所以唔敢做好瘋狂嘅事,試過喺蘭桂坊見到Danny,都只係同佢打個招呼,要求合照都唔敢。」歌迷Tammy雖然兩年前才開始聽Danny嘅歌,但一首《天涯路》就將迷住了她,終於成功加入歌迷會,認識到一班同樣喜歡Danny嘅朋友,重溫不少Danny往事。
6位Danny迷聚首一堂,不斷翻看昔日剪報,Liza有一件Danny於89年澳洲演唱會嘅團隊制服,她說:「有錢都買唔到,係我一個有份做製作嘅朋友送俾我,雖然件衫啲變黃,但我唔捨得洗,係歷史痕迹。」阿儀就最記得Danny去尖沙嘴海城夜總會登台,有機會握手和合照,遇有每年Danny的生日聚會,Danny會彈琴給大家聽。問大家覺得Danny對自己最大影響是甚麼?眾人皆認同Liza所講,Danny留下了三個字給大家,就是「真、善、美」。
精選娛聞,喺晒《娛果》
http://fb.com/appledailyent
今個星期六嘅歌迷聚會,Danny哥哥同爸爸都會出席。