葡萄牙澳門操練花絮

蘋果日報 2002/05/20 00:00


雷哥斯達好鬼躁
葡萄牙噚日開始晨操晚練,晨操嗰陣雷哥斯達唔知係咪因為天氣又濕又熱,搞到佢心情唔多好,鬼死咁躁,好幾次拉起雙層波衫同助教講嘢,雖然唔係好知佢講乜,但見佢不停指手畫腳,唔知係咪話衫厚得滯,着得佢唔多舒服呢?

葡軍嚴禁傳媒私下採訪
前晚葡軍新聞官再三同所有採訪葡萄牙集訓隊嘅傳媒講,唔可以私底下同球員有任何接觸同做訪問,一切要透過佢哋安排,噚朝葡軍新聞副官山度士先生喺球場睇練波時,一見有電視台舉咪就即刻快步上前阻止,叫佢哋唔好試圖問嘢,真係緊張到暈。

沙維亞古圖自動加操
葡萄牙頭兩課操練比較輕鬆,夾埋操咗都唔夠個半鐘,但利物浦嘅沙維亞同拉素嘅古圖就相當勤力,跑圈多數都帶頭,大隊收晒操時,佢兩個就自動自覺加操。