莎莎集團太子爺郭浩泉(Patrick)創立嘅男士服裝品牌Derby今日喺中環開幕，除咗Patrick父母、家姐同姐夫，佢嘅好友何猷亨、林作同薛世恒等都有出席撐場。

賭王兒子猷亨接受訪問，佢話主要係撐好友Patrick，仲話已經訂咗套西裝，猷亨話近年都係忙打理家族嘅地產生意同澳博業務，賭王都有寄語猷亨，佢話：「爹哋叫我努力工作。」講到細佬猷君喺網上幫猷亨徵婚，猷亨話：「都有聽聞呢件事，有排都唔會，唔係真，玩吓啫。」問佢需要徵婚嗎？猷亨就話睇緣份，仲話媽咪唔會催佢，屋企係主張自由戀愛。問到「徵婚」後有冇多咗女仔埋身？佢話：「不嬲都冇。」至於提到擇偶條件，猷亨就話好睇感覺同眼緣，咁使唔使好靚㗎？佢就話：「最主要係內在美。」問到兩兄弟係咪都鍾意模特兒？猷亨就話：「係咩？佢嗰個係朋友啫，唔係女朋友，我喺屋企冇見過。」而講到情人節，猷亨就直認lonely，又話自己冇人約，所以約咗班男仔食餐飯，咁有冇追求目標？佢就話：「未有，不過咁講大家都唔信。」

最港電影大獎投票網址
http://bit.ly/thekongestfilmawards

精選娛聞，喺晒《娛果》
http://fb.com/appledailyent