港股上個禮拜喺24000關頂咗3日，昨日失守埋呢個關，再落去就要睇250日線守唔守得住。
花旗股市昨晚休市，港股今朝點走都係睇㗎仔股市同國內A股，如果兩邊都好似昨日咁跌到頭擰擰，港股今日都唔睇好。
不過，下跌都有兩個方式，一係急跌；二係慢慢跌。如果淡友玩大幅裂口低開跌穿250日線，咁就要留意收市嘅變化，看會否掉頭高收展開反彈；如果裂口低開仲要大陰燭低收，咁個市仲有排跌。大市如果係慢慢跌，條250日線咁近，短線會整固。

中交建C輪6865：中交建（1800）昨日上晝仲好硬淨，但係晏晝都要跟大市跌，不過，低位都算企得穩，個市定番啲，中交建可以試22元，睇位買啲C輪6865短炒，隻輪昨收26.5仙，槓桿率7.5倍（有效4.8倍），正股升上22元，6865可見41仙，正股跌穿19元止蝕。