無追《她她她的少女時代》，但見觀眾喺網上開post貼咗張「少女爆眼」劇照，當中仲有警察現身，唔通TVB劇又神預言？劇組又偷偷地表達立場？

其實，林凱恩被打爆眼皆因同胡樂冰爭仔嗌霎繼而開拖所致。不過，田蕊妮喺醫院教訓養女林凱恩嘅說話，唔少網民特別係有參與過「反修例示威」嘅網民，感受都特別深，事關對住爆眼瞓醫院嘅女，阿田竟然鬧：「之後停學、有案底、一世睇唔到嘢，都係你自己攞嚟㗎！」真係似足一班示威年輕人每次抗爭完被藍絲、成年人、家長鬧嘅說話，無十足都八九成似，更誠如林凱恩喺劇中反駁：「年輕人谷到爆喇！」

情節咁貼身，唔怪得話罷睇，但網上又咁多post討論啦。何況，余思霆喺劇中真係好吸睛，就算有演技、口音問題，但佢對住曹永廉，制服誘惑、床上挑逗甚至腿張開出齊晒，簡直玩晒、贏晒！好羨慕廉伯呀！

BTW，視后李佳芯以前都係靠演姣屍炖篤獲得關注繼而上位，而家余思霆喺TVB工作多多，上至劇集下至綜藝都有份，只欠未唱口音歌，絕對有機會成為大台一線女藝人，何況佢只得25歲，大把日子。

9月2日起升級條件將更新 繼續每月撐壹仔 講真心話撐住我香港！