啱啱先開始2015年嘅第一日，韓國娛樂圈話咁快又玩爆戀情，而男、女主角就係傳緋聞兼婚訊多時嘅電影《盜賊門》男星李政宰，同埋韓國三星集團會長前妻兼韓國大象集團富家女林世鈴。

其實，李政宰同林世鈴喺10年開始，已經多次被傳出約會同出外旅遊，近年仲傳佢哋好事近，不過因為一直都冇被人影到相，所以李政宰同林世鈴都堅稱大家只係好朋友嘅關係。

不過今日，有韓媒就公開多張佢哋喺約會嘅相，而喺上月26日，李政宰就被目擊坐住林世鈴駕駛嘅房車去到首爾清潭洞撐枱腳，二人其間仲表現親暱，十足情侶一樣。而傳媒更猜測佢兩個可能係喺前一晚一齊過夜度過聖誕節之後，再起身醫肚。而韓媒更踢爆，佢哋好多次都會選擇喺大家嘅屋企或者辦工室度約會，而當李政宰冇工作的話，佢哋一個星期仲會見3次以上，然後第二日朝早更一齊離開返工。

相片公開之後，李政宰方面就話要再確認消息，而林世鈴方面就繼續話大家只係好朋友關係。