廖啟智去年中深圳為電影版《尋秦記》開工 鄧一君證精神好
蘋果日報 2021/03/23 20:42
鄧一君廖啟智尋秦記古天樂
資深演員廖啟智患上胃癌，正入院接受治療，太太陳敏兒今日到醫院照顧他。智叔去年確診患胃癌後，已全面停工，而他證實患癌前，於去年中有參與電影版《尋秦記》拍攝，與電視劇版一樣，飾演烏有博士。
同樣有份拍電影版《尋秦記》的鄧一君，今日接受《蘋果》訪問，得悉智叔患病時，他十分關心︰「聽到呢個消息當然唔開心，其實我同智叔唔係好熟，我連佢電話都冇，希望佢快啲好返。」自言細細個看智叔演戲睇都大的鄧一君，談及去年跟智叔拍攝時的情況，他說︰「舊年5、6月我哋喺深圳拍戲，當時見智叔完全冇異樣，精神仲好好。」
鄧一君、智叔和古天樂都是跟電視劇版本在電影版中演現代人，至於鄧一君和智叔有否對手戲？他說︰「唔算多，我同智叔同場戲好少，反而古仔就同佢最多對手戲。」談到當時拍攝環境，鄧一君表示︰「我哋喺深圳拍廠景，多數係夜晚開工，所以唔係好熱，唔算辛苦，拍得都幾輕鬆。」
同智叔曾合作電影《點五步》導演陳志發表示︰「拍電影、演戲同人生都好似，關關難過關關過，通常過完難關都會有美好開始。相信智叔論戲裏戲外，都係一位非常好嘅前輩。智叔一定會過到難關，祝智叔早日康復，希望可以儘快同智叔合作。」
鄧一君在電視版《尋秦記》演富商李小超。（電視截圖）
廖啟智在電影版中同樣演烏有博士，與古天樂最多對手戲。（電視截圖）
廖啟智去年中仍有參與《尋秦記》電影版拍攝，當時有同場的鄧一君見他精神好好，沒有異樣。（資料圖片）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！