愛我別走…如果你說你不愛我……

洗米華噚晚喺太陽城其中一位股東搞生日派對上唱出《愛我別走》，賓客即拉洗米嫂Heidi上台，叫佢哋復合，洗米華更情深攬住老婆，之但係據洗米嫂閨中好友講，今次洗米嫂係堅決離婚。

呢個派對由林盛斌（Bob）擔任生日派對司儀，Bob接受《蘋果》電話訪問就話：「噚晚有主人家生日擺酒，現場有見到華哥同Heidi，有朋友拉Heidi上台，當時華哥唱緊《愛我別走》，大家嘻嘻哈哈好開心，朋友仲叫佢哋合唱。」

問到Heidi係咪激動到喊？Bob話：「我見唔到喎，佢可能有少少尷尬，當時華哥都有少少醉意。」佢哋喺台上講乜？Bob講：「佢哋冇乜講，只係朋友想佢哋一齊，Heidi都有一齊唱歌，張耀揚都喺度，呢首係張耀揚嘅飲歌，大家搞氣氛，群情都好洶湧。」(影片連結： http://bit.ly/28IJOi5 )話晒呢首歌…又點少得聽耀揚哥嘅走音版本……

講到洗米華同Heidi係咪坐同一張枱？Bob話：「見到唔係一枱，但佢哋返落台後，都有坐低飲杯嘢，佢哋講乜我冇理到。」問到佢哋係咪喺番埋一齊？Bob話：「我唔敢講，希望佢哋好好處理番，但現場賓客都想佢哋一齊，大家都想佢哋一齊。」Bob話喺工作上同佢哋成日見面：「華哥畀好多機會我，好多騷搵我做司儀，台上我都有問Heidiok嗎？佢話ok，冇醉，都清醒嘅。」