現年44歲嘅李漫芬（Fanny），舊年同圈外男友談成坤（Alvin）結婚後，今年4月1日愚人節生咗個B女談在心。今晚Fanny喺尖沙嘴一間酒家幫囡囡擺百日宴，筵開15席。Fanny同老公帶埋B女接受訪問，B女着住件粉紅色衫仔好趣緻，記者哥哥姐姐圍住佢影相，佢都好乖冇扭計。影相時B女本來由爸爸抱住，但Fanny就叫老公交畀佢抱，兩公婆爭住抱B。

做咗人媽咪嘅Fanny話好感動，問BB難唔難湊？佢話：「托賴都OK嘅，因為佢成日都笑，有對腰果眼，好冧到爸爸，以前爸爸收工返嚟第一個錫我，o依家就唔係，第一個錫囡囡，我o依家地位不保。」BB戒咗夜奶未？Fanny話：「o依家戒咗夜奶，最辛苦嘅時間過咗啦，頭一個月真係冇得瞓囉。囡囡o依家照鏡都知道嗰個係自己，會搵個額頭貼落塊鏡度。」

B女對鏡頭敏唔敏感？老公Alvin話：「佢對鏡頭好敏感，同埋好多表情囉。」問Fanny老公o依家咁冧個女會唔會呷醋？點知Alvin即刻笑笑口搶住話：「上年我哋感情好好，不過o依家爭小小囉。」訪問時Fanny抱住個女，老公就負責揸咪，問佢哋有冇爭住抱BB，Alvin就話：「好明顯啦！我都唔想揸咪。」有冇計劃再追個仔？Fanny未答佢老公已經爭住話：「其實我有諗過，始終將來如果有兩個嘅話，佢兩姊弟或者兩姊妹都會有商量有照應。」不過Fanny話：「我唔知呀，生呢個女都係天意，如果有嘅話係天畀我嘅禮物。不過多年前有個相士都話我會有兩個小朋友嘅。」Alvin話自己好想三年抱兩，不過老婆生BB嗰陣好辛苦。

生完BB後Fanny努力修身，佢話o依家仲差8磅先至達標，至於Alvin就話自己反而瘦咗連胸肌都冇埋，因為返到屋企就要湊B同做家務。問會唔會一家三口拍廣告，Fanny話：「都樂意㗎！」

陳煒原來談在心係佢契女，但今日先係契媽契女第一次見面，陳煒第一時間封咗封利是畀契女，同抱抱契女。煒哥話：「談在心係我第一個契女，其實我奉獻咗好多第一次畀Fanny，佢結婚時我自薦做姊妹團同做MC，既然我同佢咁投契，所以叫佢快啲生B，咁我就可以做契媽，今次第一次見契女，送上祝福同小小心意，有小小心意，佢大個咗先至會孝順我架嘛。我諗談在心咁乖，Fanny都好想快啲生多個嘅。」而煒哥話9月後先至會搞上契儀式。煒哥又話自己唔識湊BB，所以會攞契女嚟做學習對象。

精選娛聞，喺晒《娛果》
http://fb.com/appledailyent