亞洲電視昨日傍晚突然於六點鐘新聞獨家報道，指股東黃炳均及王征已將控股權轉讓給港視主席王維基，其後，亞視正式發聲明，但未有透露王維基持股量，不過今早港視網路有限公司主席王維基澄清，主席王維基曾經於二零一五年三月二十六日與王征進行一次會面，就有關怎樣協助亞視繼續營運及延續本地免費電視節目服務牌照事宜交換及討論初步想法。王維基並没有代表其本人或公司，與任何人士就可能交易達成任何協議或原則上約定。

今日《明報》報道指，亞視新聞部於《六點鐘新聞》、即傍晚新聞時段前10分鐘，先至接獲管理層通知股權轉讓消息。當時亞視執董葉家寶先於下午5點50分致電新聞及公共事務副總裁陳興昌，再WhatsApp聲明內容俾陳，而噚日傍晚播出嘅六點鐘新聞，亦由陳興昌兩次讀出亞視將轉讓股權予王維基之消息。

亞視新聞部副採主陳國揚今日現身亞視總台，接受訪問時指：「王生(王維基)今日亦發咗個聲明，等我哋再瞭解多少少，先知道係點。」

會否覺得訊息再次令員工空歡喜，陳國揚表示：「首先喺成個發牌上，呢件事包括我哋嘅人工，都纏繞咗我哋好耐。員工方面，好多都諗咗壞嘅方面先，同時間，這一個訊息係噚日突然之間出嚟，我相信依家係問我都好，你話有人買、有人傾，嚟緊做法係點，要先睇局勢，唔係你有人買，就一定發到個牌。」

有網民覺得今次亞視單方面宣佈出售股份，被稱為「誤報江澤民死訊事件」翻版，陳國揚指：「首先第一件事，我好希望大家都明白到一間公司出一份聲明畀你，大家都會睇到，有人會通知，通知者係管理層最高級嘅人，喺一間公司嘅交易上，能夠接觸嘅人相當之少，如果有一個接觸到嘅人士，向我哋發出聲明嘅話，我哋相信當中係有人會承擔。」