當年今日

歐洲廢除獨家代理制

蘋果日報 2002/03/03 00:00


正當香港一眾準車主猶豫緊水貨同行貨之間嘅選擇,而水貨、行貨並存之局,又能否帶出公平市場競爭嘅話題時,喺地球另一端嘅歐洲車市,其銷售模式正醞釀一大劇變,並值得同大家討論一下。
歐盟嘅競爭委員會,推出咗一份關於歐洲售車模式嘅建議書,大前提係減除車廠對賣車嘅控制權,刪除個別地區嘅獨家代理優勢,容許在自由競爭下賣車;而另一重點,就係要求車廠公開旗下車種嘅機械資料庫,令個別維修公司亦可以直接取得電腦資料,以便為客人修理汽車。同時,車廠亦不得迫令獨立維修機構使用原廠零件,並容許零件生產商可自行售賣零件等等。
呢個翻天覆地嘅改變,將令到整個歐洲嘅賣車模式重新確立下來;喺現存法例下,若某間車廠喺個別地區嘅市場,佔有率達15%或以上時,便有權設立獨家銷售網,當中福士喺德國有此優勢,同樣情況亦出現於意大利嘅快意、法國嘅雷諾和標緻先進PSA集團身上。
喺新例之下,車廠若要求代理要先符合某些要求才可經營的話,如要指定陳列室嘅員工質素及設計等等,便不可能在歐洲境內設立任何獨家代理網絡。(二之一)

文:陳自齊