郭羨妮(Sonija)今日喺馬鞍山出席奧比斯活動，聽日就係父親節，問佢會點樣慶祝，郭羨妮話因為老公要返大陸工作，所以囡囡已經同爹哋提早慶祝：「我哋嗰日食咗餐好味飯，我煮咗龍蝦湯，囡囡俾咗個驚喜爹哋，整咗個獎盃送給佢，仲讚爹哋係super hero。」

Sonija話早前老公喺個女面前打筋斗，結果囡囡將爹哋當咗係英雄，但係Sonija話唔呷醋，事實上囡囡一直都好關心自己，好似會問吓點解最近會消瘦，又會讚自己化妝後好靚。講到造人大計，Sonija坦言同老公都好想追仔，但係大家嘅工作都好忙，問佢會唔會計吓日子易成事啲？佢話：「我哋好welcome有多個，但唔會太刻意，o依家有個女已經好開心。」