雖然候任特首林鄭月娥今日回應記者提問時話呀，對於有傳中國國家主席習近平今年七一來港，至今未有消息公佈，但適逢特區回歸20週年兼新一屆班子上任，習大大稍後訪港都幾乎係鐵一般事實咯，政圈仲熱傳佢嘅夫人彭麗媛極大機會隨行，或會喺唔少活動亮相。

早在去年底梁振英未宣佈棄選特首時，有來自北京的中間人已經向香港政圈探問，習大大若然回歸前後訪港，七一幾多人上街「贈㷫」？由於當時「勁草」仍蓄勢去馬，政圈普遍悲觀估計50萬都走唔甩，後來梁落林鄭上，條數就唔係咁計咯！

花生友聽聞，觀乎林鄭當選後冇乜大錯、民望又開始回升，北京初步評估七一上街人數唔會再爆燈，始終冇咗梁振英，市民心情都唔同咗。而喺呢個時候，軟銷都幾重要，唔少政圈中人就被問及，如果彭麗媛以中國第一夫人身份陪同到訪，會唔會都有啲舒緩怨氣嘅效果？深信佢到訪時嘅衣著配搭，都會成為市民茶餘飯後討論焦點，肯定又可轉移視線。

既然咁有戰略作用，加上今年七一係香港大日子，花生友聽聞彭麗媛陪同來港機會高唱入雲，甚至有啲團體都籌備緊活動，畀呢位第一夫人參加同市民接觸。外界當然好關注，呢位歌后會唔會喺訪港期間開金口？事實上佢近年已經鮮有公開表演，如果再為香港開腔，帶出嘅政治意味肯定大過歌曲本身咯。