李蘢怡自減肥成功後，頻頻穿背心短裙出席公開場合，展示其玲瓏浮凸的身段。昨日Tiffany現身將軍澳電視廣播城，身穿背心連身短裙，胸前貼着數目字「35」，背部還有個老虎圖案，似警惕自己時刻保持苗條。

自稱亞洲名模
問Tiffany短裙上的數目字是否有特別意思，她說：「條裙唔係我揀，不過我真係好開心，可以keep住咁瘦，以前虎背熊腰，搞到好多人以為我前面好大，𠵱家減咗之後，三十五吋胸就好標準。同埋以前個pat好巨，所以唔敢行喺啲男仔前面，成日都係側側哋咁行，怕俾人笑個pat大，不過𠵱家自信返晒嚟！」
Tiffany透露日前剛從法國返港，在當地為修身堂拍攝新泳衣照，她說：「去法國就係影三點式，影咗成十套。」但Tiffany不太習慣穿三點式在街頭影相，她說：「條街好多人望住，重有人偷影我，有啲法國佬重猛問我係咪模特兒，我個繙繹咪敷衍佢哋，話我係亞洲超級名模囉！」

報紙檔前影相
而老闆娘張玉珊對Tiffany要求甚高，張玉珊說：「喺法國影相時，我唔畀佢着外套，我要佢習慣着住三點式企喺人前。我哋重特登去巴黎街頭，喺一啲報紙檔前面影相，好特別㗎。我重為每個代言人預備咗一個營幕，方便佢哋喺街頭換衫影相。」
採訪、攝影：楊潔雯