麗新發展（488）受惠火熱樓市，單係灣仔活道萃峰潛在變現及獲利，豐厚到流晒口水，麗展要買。麗展同AIG合營的萃峰住宅項目（佔50%權益），已開始推售，若悉數售罄，估計可以套現26億銀，以麗展權益攤分，潛在變現13億銀。要咁睇，呢期香江地產市道Keep住火熱，要達標唔係難事。
又計計數，麗展潛在變現金額，相當於每股9.2仙，係現價（0.161元）嘅57%；又保守當純利率得50%，項目潛在獲利6.5億銀，折合PE都係得3.5倍，吸引到痹。再講，就算唔計呢壇製作嘅獲利/增值，同埋重整架構後，嚟自內房股麗豐（1125）增值機會，麗展最新NAV每股0.6元，折讓高達73%，又係流晒口水。博麗展現價翻半番到0.24元，折讓未有耐上到50%。

寶佳炒業績博賺33%

首長寶佳（103）現價（0.81元）貼近1年低位，價殘兼可以博炒業績。睇番今年上半年，祖國汽車產銷量分別達到892.7萬及901.6萬輛，按年增長超過45%，寶佳主打鋼簾線產銷業務，受惠汽車工業市場繼續好景，相信亦有唔錯表現，嚟緊已經可以炒半年度業績，會有增長。趁寶佳價殘，呢轉博股價升番上NAV每股1.08元水位，現價回報率33%。
錢雋