方皓玟（小明）和陳柏宇（Jason）即將在11月合體為商台演出拉闊音樂會，日前齊齊現身九龍塘接受訪問，談談演出主題及準備過程。今次以「The Quote」為題，意指在日常生活中接觸到的金句名言，小明表示：「我哋兩個啲歌入面有好多人生哲理同命題可以Quote到出嚟放喺音樂度，成件事好似你去咗一個圖書館聽音樂。」

日常在社交網絡上都隨時見過不少金句，可有一組字句特別令兩位留下深刻印象？她說：「其實金句唔一定要好驚天動地，只需要講得中你就得，我聽過Jason嘅歌《沒有你，我甚麼都不是》有一句係『做我的我便吸引』，發現呢句同我自己價值觀好似，男女都一樣做自己就最好，就係呢啲細微位希望大家有共鳴。」然而，Jason話暫時未有令他特別深刻的金句，更坦言：「係人都知我長氣多嘢講，好少用金句，精簡真係唔係我強項。」不過他就有特別要求：「我好想唱小明寫畀人哋嘅歌，其實好好聽㗎，因為佢未寫過歌畀我。」在旁的小明說：「你唔問我攞？今晚就開工寫畀你。」Jason笑笑口答：「想問㗎！不過問咗怕畀壓力你，又怕被你拒絕。」

兩位現在都已榮升父母，屆時家人們亦會現身支持，小明笑言要囝囝Luca是首次看她演出：「我好懷疑佢認唔認得台上嗰個係我。」又稱Luca到時跟Jason的囡囡Abigail互相認識一下，Jason就笑稱：「其實個女未必坐得晒成個騷，佢都冇咁多心機去睇爸爸表演，上次我演唱會佢一早就瞓着，因為根據佢嘅作息時間，我哋開騷係8點幾佢其實已經開始眼瞓。」兩人更笑稱要考慮加插兒歌環節，因為大家都經常會唱兒歌給仔女，Jason說：「平時喺電視機度播兒歌佢好專心睇，一調轉播自己嘅MV佢就走咗去。」旁邊的小明表示讚同：「我個仔都係咁，兒歌嘅吸引力大過晒我哋。」

講到近日香港的社會氣氛確實不太好，作為表演者今次亦屬娛樂節目，兩位可會因應社會環境向入場觀眾打氣及傳遞一些信息？Jason就表示無刻意去想：「因為我哋今次係講金句，會係偏向一啲做人睇法同生活上嘅嘢，我諗就算我哋唔係向住呢個方向做，觀眾都好容易對號入座，但我本身係冇呢個打算。」至於小明就覺得在現今的環境下，仍可用音樂跟大家溝通互相取暖是難得：「希望透過今次音樂會，喺呢個環境下暫時放鬆一吓，互相支持。」

小明更用上自己的作品《你是你本身的傳奇》內一句歌詞勉勵大家：「即使不完美只需經歷你自己，可能生活同社會上有好多嘢未必係我哋滿意，或者令我哋失望，的確係唔完美。但大家都一齊經歷緊呢個環境，所以你並不是孤單，我哋大家都一齊經歷，呢個艱難嘅時候我哋互相支持互相加油。」

採訪：曹家誠

陳柏宇
髮型: Alex So@The Attic
化妝: Jessica Chan

方皓玟
髮型﹕Jimmy White@DE LOTUS
化妝: YannesLee@ndnco

-----------------------------
【撐學生】
召集有心人 撐學生全年睇《蘋果》
立即按此
-----------------------------
《囚牢之疆》 專頁
揭開集中營邪惡面紗
今日新疆 明日香港