【我的置業故事】七年儲夠百萬首期 社工買「神則盤」因冇人吼
南昌一號我的置業故事
曾經有100萬元的首期擺在你面前,你沒有買樓,等到升市的時候已望塵莫及,香港地最痛苦的事莫過於此。此情此景,彷彿是80後社工黃太的寫照,「2016年準備結婚買樓啦,但係到我哋結埋婚啦,都仲未買到樓。」明明有100萬元首期,新樓抽來也抽去,抽到教人掉眼淚。索性轉投無人吼、不用抽籤的恒地(012)「神則」深水埗南昌一號,被問「神則」點算好,黃太話偷盡窗台擺床,「銀仔都有兩面啦,又想負擔到,又想有房,咁自然就唔能夠要求太高!」
外表年輕的黃太訪問開頭就嘆:「我哋2016年準備結婚買樓,但係到我哋結咗婚啦,都仲未買到樓。」兩公婆出來打工後堅持每月儲起人工三分二,儲了6、7年終於儲夠100萬元,但仍感慨:「我哋有啲朋友一畢業就即刻買樓,到而家差唔多都供斷咗,好羨慕!嗰陣200幾萬都買到400幾呎嘅樓,但當時我哋無能力,人工唔高。」
落力抽新樓,得不到前籌。要求不是堅離地,只是人抽我抽、地區交通算不俗的新盤,諸如元朗Grand Yoho、荃灣柏傲灣及全‧城滙,「唉!我哋真係無抽獎運。」越抽不到,越要承受樓價上升的壓力,「開頭睇啲呎數,都好似負擔到,去到後來覺得越來越貴,有啲心急,有啲驚入唔到市。驚自己儲起個筆首期,可以揀嘅選擇會越來越少。好辛苦儲咗筆首期,但樓價越來越高,擔心自己個筆首期唔能夠再上車。」黃太買樓主要考慮近娘家、近返工、交通方便,轉投二手市場?「睇下返工附近二手樓,好似鰂魚涌康怡花園都仲貴過而家呢度(南昌一號)」、「睇過30年樓齡嘅舊樓,大維修時拎十幾萬出來會好吃力」,最終沒有買二手樓。
跟風抽全新大型樓盤,一直忽略娘家附近新盤恒地「神則」深水埗南昌一號。樓盤總共129伙,2016年10月進行首輪銷售,首批推出50伙僅沽逾一半,次輪賣18伙開售當天更是零成交,其後迫使發展商加佣、延長即供成交期。
人棄我取揀「神則」,難道就為不抽籤?「係。抽新樓通常買多於一個單位嘅大買家排一條優先隊,好嘅平嘅單位都係佢哋買咗先,我哋買唔到心水單位。」她表示:「本身住開呢區,希望住近媽媽,呢區三房選擇唔多,周邊民生設施有街市、綜合體育大樓、泳池等,十分鐘內行到南昌站或深水埗站。未來附近有好多舊樓收購及重建,政府有意計劃改善深水埗的居住環境。」她補充:「同老公計劃諗住生BB,都考慮到呢度校網,都有啲band 1嘅中學。」
對於南昌一號「3房神則」,其中最細房間僅37方呎。她回應:「會訂造一張床,可以偷埋窗台位嚟擺床。」她稱:「銀仔都有兩面啦,又想負擔到,又想有房,咁自然就唔能夠要求太高!市區想買到3房樓真係唔容易,而且3房呎數太大,自己負擔唔到,呢個係好選擇。買樓睇過啲則,窗台有位置,諗過傢俬點擺先。」
心儀的3房單位售價高達780萬元,但自己僅約100萬元做首期,惟有做「父幹族」,靠家人資助數十萬元,湊夠兩成首期上車。上了車卻仍勒緊褲頭,「我哋用咗呼吸Plan,3年後利息好貴,所以呢3年好努力儲錢,盡快搣甩二按。我哋做過銀行壓力測試,又計過每月儲嘅錢可唔可以係3年內還清二按先決定入市。買嘅時候都好驚負資產,或者還唔到二按,如果有啲咩,其實都係要硬啃,所以佢(高成數按揭)都有唔好處。而家還咗2年,呢1年好努力儲錢,希望還埋個二按。暫時都負擔到,我哋好慳嘅!」
日前收樓後第一印象是單位手工乾淨,擔心單位有漏水問題。資深驗樓師詹濟南徒弟陳智康「康仔」負責驗收黃太單位,全屋來去水都沒有問題,不過浴室企缸水龍頭與瓷磚的銜接位出現窿仔,個別發展商會唧玻璃膠封口,或喉管邊唧膠,但現場見兩者都無做,「如果唔整,水會慢慢滲落瓷磚背。而且企缸兩個牆角有窿,大到可以攝入紙仔,有機會滲水入磚底。」他建議將這些窿位全部填補,以防日後滲漏。
另外,空心磚發現2塊,分別露台門邊一塊,另一塊位處細房窗邊外圍,康仔指:「呢塊空心磚比平時空得緊要,淨係靠條唧膠黏住,相信伸手輕輕一拉就會拉出來。如果發展商唔整,水會由空心磚慢慢滲入屋內。」他又指,單位有些貼心設計,露台近趟門頂的鋪磚稍為凸出,是為了達致止水效果;浴室鏡櫃內插頭有防水罩;廁所假天花生口板釘位套上膠粒以防弄傷。四大扣分位當中的批盪、來去水全部滿分,外牆空心磚雖然危險,但僅2塊,扣4分,驗樓評分90分。黃太稱原本預期七、八十分,現在比預期好。
影片
採訪:陳家雄
編撰:張嘉鎣
攝影:Wyman
剪接、後期:Eleen
編審:楊智佳
-----------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX
80後黃太以約780萬元購入南昌一號「3房神則」。
黃太身處單位較一間房,計劃做主人房,並偷窗台做睡床。
詹濟南徒弟陳智康「康仔」驗收黃太單位,發現細房窗邊外圍有一塊空心磚,「比平時空得緊要,淨係靠條唧膠黏住,相信伸手輕輕一拉就會拉出來。」如果發展商不處理,水會由空心磚慢慢滲入屋。
單位有貼心設計,廁所假天花生口板釘位獲膠笠套住,以防開關時不慎被弄傷。