第三十屆香港記者協會主辦嘅「記協盃」足球賽今日結束，由記者組成嘅記協隊同政府新聞處職員聯誼會喺友誼賽對決，記協隊最終以3比1力壓新聞處。比賽喺九龍灣啟歷學校天台仿真草足球場舉行，擔任頒獎嘉賓嘅新聞處處長聶德權話場地超正，雖則新聞處輸波，但佢話雙方都好落力，最重要「友誼第一」。聶處長平時冇乜點踢波，原因係踢波要約齊人，佢反而鍾意跑步，一個人成行好有彈性，而佢跑咗兩年渣馬十公里，第二次喺一個鐘內跑完，比第一次快咗，拎咗個進步獎。

記協盃冠軍賽則由電視台同工程人員組成嘅「TVU」，以4比0大勝由娛樂、馬經、體育記者組成嘅「飲勝」。季軍賽則由體育記者組成嘅Hartiend以2比0勝由娛樂、雜誌記者嘅「柴娃娃」。