大市聖誕前能否止跌，突然殺淡友一個措手不及？總結呢一浪調整，可以話係跌凸咗。無獨有偶，當20900至21000水平嘅牛仔被大屠殺後，好友紛紛縮沙，轉晒倉落兩萬點邊牛仔，大戶亦冇誘因沽落去，反而倒轉殺熊，仲有幾百點又係重貨區，小心有糊唔食輸埋聖誕禮物。
同城中著名經濟師及分析員傾過，基本對市況已有共識，因為美金彈，股票即使升都唔升得去邊，兩萬三已經好盡，反而多方聲音喺賣地前發功，狂谷本地地產股，睇好樓市升到2011年，理由竟然係因為未見有人瞓街排隊買樓，顯示樓市仲係健康；仲有係舊調重彈講超級通脹，人人買資產保值。咁點解金價好似有見頂回落之勢？

轉身快有高息派

點都好，升市莫估頂，樓市繼續癲多兩癲絕對唔奇，炒樓好處係槓桿大，升得快；唔好處亦係槓桿大，市況突變時走唔切。其實要做業主除咗買樓，仲可以買REITs當長線投資，一來轉身快，二來有高息派。今年最好表現嘅REITs喺晒亞洲，平均升五成，歐洲同澳洲就分別升35%同27%。香港人人都識領匯（823），其次係冠君產業（2778）、泓富產業（808）同越秀房託（405），都提供到比滙豐控股（005）更高息嘅選擇，特別係當市況唔好時，呢類股防守力更強，進可攻退可守。
好多人以為REITs即係地產股，其實係房產信託基金，簡單嚟講係將旗下物業所收租金（一般90%以上），扣除成本後畀投資者。同地產股唔同係佢哋唔會買地起樓，所以增長潛力靠租金同資產升值，就等於大家夾錢買商廈、商場，係一般散戶較難涉足嘅投資領域。除咗咁，好處當然係轉身快、透明度高，係買樓以外，擴通脹嘅投資妙品。
不過要小心睇清佢哋手上資產係咪筍嘢，同基金對資產值折讓有幾大。幾隻REITs當中，領匯優質但價格較波動；冠君同泓富差唔多，都係商場、商廈。論升幅就以冠君佔優，而且近期商舖屢創新高，佢旗下朗豪坊日日車水馬龍，加上有近7厘息確係吸引。讀者若持有太多高風險股票，想安心啲過平安夜，半日市可以考慮換啲REITs坐吓。
胡孟青