過氣教育沙皇李國章，最近同佢位前下屬羅范椒芬「再續前緣」，埋咗狼堆齊齊砌隻豬。沙皇不嬲口不擇言，噚日喺商台節目再踩隻豬，話唐唐為人一向和藹，唔明佢點解會提出梁振英講過「防暴隊論」，「唔知道邊個教佢」。寸嘴沙皇又話，自己好「同情」唐唐，因為佢花咗好多工夫同努力喎，但覺得佢有「官仔脾氣」。
沙皇之前挺身而出「證實」狼振英冇講過要出動「防暴隊」，不過呢，沙皇開會時好可能只顧住打機，邊個講過乜佢真係記得？佢喺節目度又辣㷫自由黨，話佢哋個黨唔支持狼振英，係「小朋友」作風。一班自由黨青年團嘅「小朋友」即日下午踩上狼辦抗議（圖），話沙皇未經民主洗禮，不了解自由思想，叫佢收回呢啲不負責任嘅言論。今次沙皇係咪唔衰攞嚟衰。