印度商人梅真尼位於渣甸山軒德蓀道3號間豪宅，終於落入信德何氏家族手上，作價5926萬。新業主係何鴻燊二太太所出嗰四位千金，組成嘅美偉投資，細妹超蕸和超儀持有該公司股份，而家姐超瓊同超鳳就係董事。
市傳呢間屋早排有買家還價六千萬，重開埋票諗住得手，點知印商突然拒售，最後就賣畀何家，個價重平咗74萬。個印商稍猶疑就咁無咗幾十萬，足可以賣層平平哋嘅樓。
蘭茜查證呢單成交時發現，何家四千金各自報稱唔同地址，超瓊報住中半山花園台1座三十一樓、嫁咗嘅超鳳報稱渣甸山睦誠徑八號、超蕸登記係中半山TheMayfair三十七樓，細女超儀係東半山蔚豪苑B座十九樓，四個都係超級豪宅，市值夾埋過億。
碧堤靠風水食胡
青山公路一帶多個新盤已陸續有動作，但九龍倉嘅碧堤半島好似唔見有動靜，個盤對正珀麗灣，又已落成，應該食正向隅客至係。九龍倉黃光耀話，碧堤主要提供大單位，買家以換樓客為主，安排下月登場。
蘭西聽講，發展商噚日見過部份代理行，提到宣傳手法，秘密武器係風水，話碧堤所在嘅青山公路海灣段，左青龍（青衣島）、右白虎（大嶼山），重有玉帶環腰（青馬大橋），住親都掂。而美聯就緊張過九倉，今日用豪華花車為碧堤啟動宣傳。
流星小滋出現長實廣告
明星在一般市民心目中有份神秘感同吸引力，香港樓盤都開始請明星賣廣告，以期提高個盤嘅知名度。
近期人氣極旺嘅台灣女星柯奐如，將會喺長實大角嘴凱帆軒廣告中出現，演繹新一代置業人士揀樓嘅要求。大家可能一時間醒唔起佢係乜水，但講起台劇流星花園嘅小滋，相信大家反應會完全唔同。該廣告明晚在無綫同亞視中文台首播，佢啲fans要密切留意啦。
星濤灣拍宜家設示範單位
發展商賣樓真係唔容易，好似嘉華國際馬鞍山嘉華星濤灣，第四季先至賣得，重有一段時間，但已準備定預展示範單位，更搵宜家傢俬合作，首創在宜家店內設示範單位。
嘉華地產營業及市場策劃副總經理文靜芝話，嘉華星濤灣八成是兩房單位，面積六百至七百方呎，上車及年輕買家係佢地嘅目標客，與宜家傢俬有共同理念，再加上物業位於馬鞍山，故決定將預展示範單位設於沙田宜家。
文靜芝又話，將會每個月更新預展示範單位內嘅布置，由今個禮拜六開始至下個月三號舉行抽獎，所有參觀之準買家都有機會中獎，名額一百，各得一千蚊宜家禮券。