香港乒壇一姐杜凱琹有排失眠，事關新科世錦賽男單冠軍兼世界一哥馬龍，點名話有機會同佢喺真正比賽中合作打混雙！
中國乒隊以世界男、女單冠軍馬龍同丁寧為首，噚日喺麥花臣球場展開訪港活動。噚日打頭陣嘅「公益金恒生乒乓慈善賽」，由馬龍拍杜凱琹，對住世錦賽女單亞軍劉詩雯搭香港黃鎮廷嘅組合；原來凱琹賽前一晚為咗場表演賽瞓唔着，佢話：「噚（前）晚成三點幾先瞓，成晚幻想好多嘢，點知今日上到場，同幻想好唔同。因為場內大風、波又輕，大家都發揮得唔係咁好。」

勁讚馬龍形象陽光正直

由於時間關係，大會只係安排一局過11分嘅比賽，最後馬/杜配輸11:13。凱琹坦言唔夠喉，仲大讚馬龍形象健康：「得一局比賽，太快、太少。馬龍一向形象陽光同正直，改咗𠵱家嘅髮型後更好，如果日後有機會再拍馬龍打混雙，當然好想。」
今屆世錦賽都加入咗「跨國組合」，馬龍就同德國嘅波爾拍檔打男雙。佢喺表演賽後都話同杜凱琹有機會再合作：「乒乓球向緊全世界發展，相信日後比賽仲會搞『跨國組合』，同杜凱琹仲有機會再合作嘅。」不過，始終一般乒球巡迴賽都冇設混雙項目，所以佢哋要再拍檔，或者要等到兩年後世錦賽啦。而劉詩雯亦話想同黃鎮廷再合作；呢位世錦賽女單亞軍仲話最想去香港迪士尼，趁聽日有自由活動時間，希望可以同米奇、米妮合照。乒總預計活動可為公益金籌得約260萬港元。
至於世界女單冠軍丁寧，雖然右腳踝傷未完全恢復，但噚日拍住九歲嘅恒生乒球學院明日之星于諾，全程都笑容滿面，並以11:8擊敗隊友閆安同九歲明日之星嚴浩晴嘅組合。中國乒團今日就會兵分幾路，到香港中小學（見附表）交流心得。