葉巧琳、林奕匡及布志綸等今晚到九展出席禁毒歌唱比賽活動。在美國讀書的葉巧琳，坦言外國較易接觸毒品：「其實同煙一樣咁普遍，好多人都會問我試唔試大麻，我會即刻say no。」林奕匡指自己在加拿大的小埠成長，毒品相對不算普遍：「雖然加拿大而家合法咗（大麻），但無論合唔合法，都係件唔好嘅事，所以一定唔會做。」

對於從事創作的人會以吸毒為找靈感的藉口，林奕匡說：「總有第二啲方法搵靈感，我鍾意冇咁拘束嘅環境、冇人喺屋企嗰陣。有時太太都會開下電視，不過佢好識做，知我做嘢都會熄細聲啲。」葉巧琳會去旅行找靈感：「睇下唔同嘅嘢，都會刺激到自己有靈感。」

提到去旅行，葉巧琳正準備下星期去泰國：「睇下男朋友請唔請到假先，如果佢唔得，我都唔會去。」身旁的林奕匡謂：「散下心都係好事嚟，我都想睇下去唔去到旅行。」

問到今年年尾是否減少了工作量？他們不約而同表示，雖然幕前工作減少了，但仍要籌備出碟及作曲等工作。

布志綸宣傳個人新歌《如果我們的語言是威士忌》，透露昨晚才與Mr.隊友夾歌：「有時間就會聚吓，睇吓有咩諗頭，我嚟緊都要為新歌拍MV同微電影，好多工作要做。我同太太又分別去咗旅行，所以有5、6日見唔到囝囝，返嚟佢好可愛咁話掛住我，我仲冧緊。」

提起囝囝Adam，布志綸流露父愛：「佢而家識睇你面口，有時會駁嘴，不過我少見佢，所以都係縱容佢，我係玩伴，太太就會嚴謹啲。」記者笑指太太犧牲自己成全他們的父子關係，布志綸即識做說：「所以母愛好偉大。」問到會否考慮再生BB？他認為做演藝是談理想的行業，擔心自己經濟冇能力照顧。

另外，有網民把演藝界分黃藍陣營，布志綸屬於黃色藝人，他說：「我冇留意，唔係咁方便評論，總之飲杯威士忌放鬆下囉，要溝通、傾偈，都要放鬆啲，加埋我首歌就好chill啦。」

採訪：盧妹
攝影：陳慧安

-----------------------------
《2019高級珠寶鑑賞誌》
點擊即睇過百款鑽飾名錶
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇