當年今日
關於我們

無心插柳 - 左丁山

蘋果日報 2002/01/24 00:00


大公關華德果然博覽各種刊物雜誌,心細如塵,連一本通常好悶嘅PostMagazine(星期日《南華早報》附送)嘅內容都一覽無遺。佢寄嚟一月十三日嘅一頁內文,幽左丁山一默,睇落又幾過癮。左丁山以前同華德講過,一生冇乜憾事,若有嘅話,就係自小靠自己去闖江湖,冇師傅指點一條好路。譬如話,讀書讀邊科、點樣讀、做事做邊行、好唔好轉工、如果轉工轉行應該有乜考慮……呢啲全部都係自己靠撞,你話當時有人指點,左丁山可能會走少好多冤枉路,或者會僥倖做咗大班都唔定。記得一世人第一次買樓,就係俾上司鬧足兩年先至下定決心去買嘅!
華德好記性,寄來嗰篇文字名為《MissedOpportunity》,作者TimDowling,臚列咗一班明星之成功、失敗,其實好講運氣,純屬撞手神,並非事先有計劃,有人指點嘅。譬如哈利波特作者J.K.Rowling拎住本書稿搵出版商,大公司如企鵝、夏巴哥連斯、環球(Transworld)都唔睬佢,只有Bloomsbury肯試吓?結果呢,你知道晒啦。莎朗史東拍《本能》(BasicInstinct)之前,半紅不黑,但MegRyan、金碧辛嘉都拒演,於是益晒佢;麥當娜想拍電視劇集《FameTV》,角色攞唔到,轉行去唱歌;EmmaBurton想話拍電視劇《EastEnders》,亦係冇人睬,之後有人邀請佢加入一隊新樂隊,叫做SpiceGirls,凡此種種,都說明好多時有意栽花花不發,無心插柳柳成蔭。
左丁山睇完諗真吓,自己亦作如是觀。