黎諾懿同麥美恩今日喺九龍城出席電競活動，大會安排佢哋玩AR對戰遊戲同賽車遊戲。玩賽車嗰陣，麥美恩完全控制唔到架車，不停失控打轉，仲緊張到成個人縮起，被黎諾懿笑佢係「婆仔揸車」。

麥美恩事後話：「真係好逼真，我啲小動作全部出晒嚟。」黎諾懿就話打機可以睇到每個人嘅真性情，仲自爆平日同老婆打機，要輸得好好睇睇：「喺屋企啲戲要好過做戲㗎，我多數輸啦，唔係嗰晚唔使瞓。」佢直言打機嗰陣都會忍唔住講「助語詞」，不過依家有囝囝喺度已經少咗好多：「老婆會叫我『Watch your language』，我啲鄉下話好少出嚟啦。」

提到囝囝會唔會睇住佢哋打機？黎諾懿話：「佢依家歲半都識睇，見到媽咪喺個遊戲入面碌落山死咗，佢識得『喔，噢！』笑死我哋。」佢覺得呢個年代，好難避免唔俾囝囝打機或者接觸電子產品，反而要控制佢哋用嘅時間：「我乜都俾佢做吓，咩都試咗先。」

問到麥美恩鍾意打機，會唔會搵番個鍾意打機嘅男友？佢覺得同男友打機係情趣：「可以顯得對方man啲，因為我成日輸。」黎諾懿即大讚麥美恩係好可愛嘅女仔，麥美恩即笑謂：「讚我冇用㗎，介紹啲男仔嚟識先得架。」

精選娛聞，喺晒《娛果》
http://fb.com/appledailyent