陳煒（煒哥）同陳爽等人，今日喺灣仔出席食店開張，而煒哥更紅色低胸晚裝打扮出現，非常性感。

雖然煒哥煮得一手好菜，但就冇諗過開食店做生意，情願不斷鑽研廚藝。煒哥表示稍後將會開劇，預計差不多要拍半年。中秋節放假，煒哥話情願休息都唔想約人：「好多人介紹朋友我識，睇過相㖭，但我都想見真人睇下人品，不過暫未有機會，等我研究下先。」

而朱璇之前喺比利時秘密結婚，陳爽去做姊妹（新聞連結： https://bit.ly/2xxaQoH ），佢話婚禮好感動同溫馨，寄望好友快啲生BB：「我哋冇搶新娘環節，冇乜特別安排要做，唯一任務係要着得靚。」而佢嘅一對子女做花仔花女，大家表現淡定。朱璇同丈夫由拍拖到結婚，陳爽都見證住，大讚男方係好好先生，能付託終生，問佢朱璇之後會唔會繼續做幕前？陳爽話：「唔清楚，可能有啲變動，佢老公工作要周圍飛，但佢好鍾意演戲，對演戲好執着。」

精選娛聞，喺晒《娛果》
http://fb.com/appledailyent