時間：02年6月

地點：馬來西亞

人物：蔡卓妍

-經過-
女子組合Twins已經出道咗6年，記得佢哋最初出嚟宣傳，賣點係清純可愛，02年6月佢哋應邀去馬來西亞幫《Yes》雜誌影《Twins1+1寫真集》，工作人員喺現場仲影埋佢哋啲拍攝花絮，輯錄成VCD隨寫真集附送。
其間蔡卓妍（阿Sa）要着紅色魚網絲襪，因為呢隻襪嘅襪頭包唔住佢啲腳趾，佢一邊着一邊話：「啲腳趾喺啲窿度叉晒出嚟，等我叉晒佢先。」可能真係着得唔方便，之後佢又繼續講：「啲腳趾係冇辦法喺晒入面㗎，叉X晒出嚟舒服啲。」阿Sa心直口快咁講咗句粗口，呢條片仲俾人擺咗上網。
之後隨寫真集附送嘅VCD入面，都冇刪走呢段片，只係將阿Sa講粗口嘅音量收細，VCD又冇貼警告字眼。對於阿Sa爆粗一事，佢經理人霍汶希（Mani）事後解釋：「聽錯之嘛，佢唔會講粗口，不過佢成日講嘢有懶音，我哋聽咗幾次，佢只係話叉鬼住晒，當時佢做緊嘢，又有咁多人喺度，在場有記者同攝記可以做證。」之不過「叉X晒出嚟」同Mani講嘅「叉鬼住晒」發音好明顯唔同，如果諗住咁樣可以拗番生，就真係牽強咗啲囉！
本欄逢周一至周六刊出