美國經濟上季加快增長，但亦面臨多種風險，《華爾街日報》做咗個調查，「美國長遠經濟前景面對嘅最大威脅，究竟係：（A）全球競爭加劇；（B）加稅；定係（C）社會越嚟越唔公平？」結果有46%網民揀B、29%揀C、25%揀A，反映美國人原來最驚加稅。
jdfree話：「美國公司稅率高過好多海外國家，如果美國唔減稅，睇怕唔少美國企業會喺海外設廠，慳番啲稅。」CaptainScott講：「如果美國下屆總統撤銷布殊推行嘅稅務優惠，就會打擊美國經濟，越嚟越難同其他國家競爭。」
paragg認為：「全球競爭會威脅美國長遠經濟前景，例如來自中國同印度嘅競爭就好大；不過，一般人可能忽略咗『貿易赤字擴大』，同美元下跌對美國經濟嘅威脅可能更大。」

高稅率迫企業外移

dickrmurphyco講：「隨住數以百萬計嘅『嬰兒潮』美國人陸續退休，福利開支會急升，嚴重削弱美國經濟。」CaptainScott話：「雖然美國社會有好多唔公平現象，但亦有唔少發達機會。」
華盛頓智囊機構「卡托研究所」稅務專家米切爾講：「美國稅制唔算全球最差，但就係第二差。聯邦企業利得稅率高達35%，仲有5%嘅州稅，兩項加埋高達40%，令美國缺乏競爭力，唔怪得好多企業將業務轉移去海外。」