爆機狂迷:全中文化N64遊戲
任天堂神遊機一插即玩
任天堂嘅N64雖然已經係上一代嘅遊戲機,其地位已經俾GameCube所取代,不過其經典遊戲仍然令玩家非常回味,最近喺國內正掀起一股神遊熱,講嘅唔係夢遊,而係可以玩番N64遊戲嘅神遊機,創新將遊戲機同手掣二合一,只要手掣接駁好電視,立即就可開戰打餐飽!
記者:許福合
攝影:陳偉強、陳智良
ImageGirl:Wendy
神遊機同一般遊戲機最大分別係將手掣同機身二合一,玩家拎住嘅手掣其實已經係整部神遊戲,大小同N64手掣相比,分別唔大,同樣有齊Analog同十字掣,排位相似,只係背面嘅Z掣略為移位,放咗喺L掣嘅旁邊,不過習慣咗都唔會有乜問題。連遊戲機嘅手掣雖然略重,但設計就幾啱手形,玩足成個鐘都唔覺辛苦。
專用神遊記憶卡
呢部神遊機即使喺國內,仍然只係上海先有得賣,除咗外形同一般遊戲機唔同外,遊戲嘅銷售方式都幾特別,放棄以卡盒或光碟作媒體,亦唔似N-Gage咁用記憶卡,而係使用專用神遊卡,玩家拎住呢張卡就可以去到遊戲店,使用神遊加油站,將遊戲抄落卡內,遊戲數量視乎容量大小,一般3至5個就必定無走雞,而神遊卡亦具備防盜版能力,提供嘅遊戲都攞正牌,全屬正版。神遊機喺國內賣480人仔(人民幣),抄一隻Game要48人仔,計落都唔算貴。
售賣點:DreamStore
地址:灣仔東方188商場256號舖
電話:25753285
■神遊機(左)同N64手掣(右)相比,大小差唔多。
■呢部就係神遊加油站嘅真身,作下載遊戲之用,暫時都唔會喺香港見到。
遊戲全面中文化
雖然神遊機只係可以玩番N64嘅遊戲,不過生產商就話部份使用嘅技術勁到要喺下一代遊戲機先見得到,不過呢啲都係紙上談兵,都係親身試玩最實際!首先就試隻《薩爾達傳說64》,除咗見到畫面有N64同等嘅水準外,最令人驚喜係遊戲全部經過簡體字漢化,除咗文字外,甚至遊戲畫面都轉為中文,加上國語配音,就好似玩中文RPG一樣!
另一隻N64嘅生招牌《瑪利奧64》,冇咗以往多邊形構成圖像嘅效果,比較圓滑,流暢度與N64接近。記得以前拎住攻略都爆唔到機,又唔清楚故事發展,呢次跟足指示,攞星星,打大佬,要過版就容易得多。
■設有目錄顯示卡內遊戲資料,同時可睇埋試玩版剩餘時間。
20款遊戲陸續出
呢次DreamStore將呢部神遊機帶到香港,跟機包括兩隻完全版及三隻試玩版遊戲,完全版遊戲為《薩爾達傳說64》同《瑪利奧醫生》,試玩版就有《瑪利奧64》、《星際火狐》同《水上摩托》,五隻遊戲係首批隨機發售嘅遊戲,一套賣$680,不過因為香港暫未有下載遊戲嘅專線,要購買新遊戲需要將神遊卡寄回內地,需時4至5日,每隻遊戲連郵費$60。嚟緊更會有超過20隻遊戲推出,當中包括《瑪利奧派對》及《薩爾達傳說:姆莎拉之面具》等,無論係咪任天堂Fans都唔可以放過重溫經典遊戲嘅機會。
■連遊戲畫面都經過中文化,《水上摩托》會見到「海豚公園」四個中文大字。
■以前玩《星際火狐》完全唔會理隊友講乜,中文版就比較容易照顧友機。