韓國tvN人氣劇《奶酪陷阱》上周一同二因為春節關係而停播，搞到唔少粉絲都話唔可以活着過年，認真誇張。

而噚晚一集就如常播出，不過唔知係唔係因為停播咗一周關係，搞到粉絲熱情冷卻咗，收視跌咗成1%，錄得5.598%收視。

噚晚播出嘅第11集，白仁荷（李成景飾）扮成吳英坤（池允浩飾）嘅女友，喺眾人面前打咗吳英坤一頓，令到同學們誤以為吳英坤一腳踏兩條船，不過吳英坤就反擊拿出白仁荷同劉正（朴海鎮飾）嘅照片，話白仁荷係劉正嘅女友，洪雪（金高恩飾）即時為劉正解釋，話白仁荷同劉正係從小認識嘅好朋友，自己同佢細佬白仁浩（徐康俊飾）亦認識。吳英坤嘅正印女友睇到呢一幕終於忍無可忍同吳英坤分手。

之後劇情講到白仁浩睇到洪雪嘅瞓覺樣，就回憶起之前同洪雪練琴時嘅情況，同時亦都終於意識到自己鍾意洪雪。

洪雪同屋企人嘈交跑咗出嚟，正傷心之際就見到劉正喺度等自己，兩個人禁不住相思之情向對方衝過去，之後相擁在一起，劉正話自己好想念洪雪，洪雪亦都話想念佢，兩人表白心意後和好如初。洪雪話唔想返屋企，劉正即帶佢遊車河，兜完風就到第二日朝早，劉正一早即撲向洪雪身邊，兩人甜蜜咀嘴咗兩次。而呢一幕正正係之前第9集結尾預告嘅片段，之前粉絲以為第10集有得睇，點知要等足兩星期先有sweet爆吻戲。

另外，徐康俊原定今天舉行抱抱會，點知因為太多粉絲關係，所以佢所屬嘅事務所就宣佈將活動改為聽日繼續舉行。