黃心穎同黃心美今日姊妹檔上陣，去尖沙咀美麗華酒店出席HKT新品宣傳活動，現場佢哋兩姊妹以趣劇形式推介電訊產品，黃心美仲自爆有男朋友，兩人又即場爆肚，黃心美大家姐本色出現，一手打黃心穎個頭。

黃氏姊妹花就話今次係佢哋第四次姊妹檔合作，講到黃心美係咪真係有男朋友？佢話只係照稿讀。問到黃心穎會唔會搵緋聞男友馬國明幫手安裝電訊設備？黃心美即話：「邊個呀？」黃心穎即指：「係喎你哋不和㗎喎。」之後黃心美就話：「我高度讚揚佢，我要澄清，我曾經喺活動見過對方，佢有等埋我round up先落台，好尊重司儀，我對佢印象好好，如果你哋係真，我祝福你哋。」黃心穎就話：「我好多嘢都識做，屋企啲電器都係我set up，執屋就交畀家姐。」不過黃心穎就話自己間房超亂，連門都開唔到，而黃心美就經常要督促阿妹執屋，仲表示發脾氣時都想佢快啲搬出去，發夢都會係叫佢執嘢。

大家建議黃心穎快啲結婚搬屋，呢個時候已經離婚黃心美有感而發話：「我都諗28歲就嫁會唔會太早，我當年都係28歲結婚，唔建議太早結，當時都唔知為咩結婚，人結我又結，可能係一時衝動 ，不如等佢諗清楚，腦囟生埋先。」不過馬國明已經一把年紀喎？黃心美笑言：「唔用年近半百形容已經好好啦。」黃心穎就好正經話：「我覺時間到就到，冇得plan ，唔應該受年齡局限。」