港大校務委員盧寵茂，日前一個轉身仆低咗，翻睇慢鏡重播又重播，如果佢唔係插水嘅，咁佢身體真係差咗少少。正所謂，男人最緊要有腰骨，跌低後唔識自己起身仲要攣弓蝦米咁瞓喺地，真係「我見尤憐」。

即係咁，「插水」同樣對股民來講，都係人見人憎，見到插完唔識彈起嘅，更加嬲到爆。A股呢排明顯「真插水」，最慘係依家阿爺不斷放彈藥落去救市，但佢一唔掃，個市就跌返。咁證明一樣嘢，就係依家個市得阿爺做買家。你一入市，班大媽散戶就沽都沽唔切。

正如菲菲之前講過，如果將中國最新GDP數據俾個「水份折讓」，係會低過7%，差過市場預期；另外係最新製造業PMI同樣差過預期。資本市場脆弱，加上經濟預期差，根本短期內睇唔到有咩因素，可以重建市場信心。

所以簡單來講，阿爺之前花嘅錢，只可以吊命。加上之前阿爺講明，以滬指4500點為目標。自股災後，滬指都未去過4200點，連目標都未達到，真係唔好同我講個市已解困。當真係去到4500點，中共官僚政治氣氛下，班友就當交咗差收手啦，唔通仲同你燒銀紙接火棒咩？

同咁解釋咗點解呢個「插水」同盧寵茂一樣，跌低咗後，只係於低位呈「彈散市」格局。