城中熱話全部係講特首請辭，人人各抒己見。中環行一圈，消息聽唔切，精警嘅亦唔少。即如渣打銀行行政總裁蘇利民噚日被人問到董先生落台會唔會影響金融市場時，呢位新大班話：「香港金融市場受到好多人影響，特首只係其中一個，正如艾爾敦（滙豐亞太區主席）就嚟卸任，但都唔見得會影響到滙豐啦！」
蘇利民係銀行家，講嘢同諗嘢都同銀行有關。八方聽完佢講，心諗如果特首係艾爾敦而唔係董建華，咁特區一定唔會搞到今日咁；行政會議點都有番一兩個重磅銀行家，大家正正經經開會，而唔係你唔順我我唔順你，開會冇人緊張，開完會就有人洩密。