內地物業質素近年不斷提高,好多示範單位布置與品味,都追得上潮流,唔似得以前,一係就老過阿爺嗰代,又或者豪華得滯,金碧輝煌到眼都睜唔開。
內地尤以深圳新盤最接近香港人口味,示範單位裝修要幾潮有幾潮,至於其他珠三角地區,好似中山、東莞、番禺等,一啲香港人最受落嘅老牌屋苑,新一期示範單位都有品味咗好多。
好似祈福新邨最新一期天湖居,示範單位就有唔少驚喜,好似浴室企缸位,整咗個魚池,廚房大半幅牆,偷空變身成巨型魚缸。
牆身做魚缸,香港新盤都見過唔少,但係就好少做得咁巨型,無他,國內一千呎樓隨時大過香港千五呎單位,裝修都可以發揮得更盡。
原來𠵱家唔少國內大型新盤示範單位,都搵香港過江龍設計師操刀,唔怪得創意強咗咁多啦。
ManhattanAvenue唔憂賣
華人置業嘅上環ManhattanAvenue,早排傳出有基金全幢洽購,未知結果如何。但若果發展商最終係分拆出售,聽講好多人都有興趣,啲客大部份想買嚟收租。有代理就話,睇怕呢個盤都唔憂賣,分分鐘會係對面荷李活華庭翻版。發展商今日會開記者會,講講個盤嘅最新情況,大家要留意嘞。
ManhattanAvenue係單幢樓,總共有七十五伙,面積一律約五百五十方呎,兩房間隔。發展商拆售意向價每方呎四千三到四千五百蚊。