【紅人主場】2000年代盛產混血女模，近年位位轉型。Amanda S.曾轉戰商界開甜品店，三年前離婚後不久又賣出甜品店大部份股份，一切回到原點重新出發。最近參與製作慈善食譜，又為餐廳任顧問，人生路上轉幾個彎，她仍然樂觀甚麼都想嘗試。談及再婚，敏感的她直言需要點時間慢慢來，「人生有好多選擇。」對愛情卻沒有失去信念，「愛一個人唔諗咁多，just go for it！」

造型、撰文：趙潔恆
攝影：郭賢興
化妝、髮型：Wendy Lee of Wendy's Workshop

當年投資百萬開甜品店，兩年前Amanda S.賣出大部份股份後，甜品店亦告清盤，一番心血就此收場，「真係好難做，就算有partner都難。」所以Amanda也暫沒有再創業的大計，但關於飲食工作，她還是懷着熱忱。「好似之前幫一本雜誌拍攝煮嘢食嘅節目，做wine pairing嘅菜式，做完好開心，都有諗過不如開YouTube channel，拍吓煮嘢食嘅片。記得以前同蔡瀾先生拍節目好開心，如果可以自己主持一個節目都好有興趣。」

Amanda也替友人開設的餐廳做顧問，為廚師建議甜品食譜，最近她參與製作時裝店Rue Madame與港安醫院慈善基金合作的慈善食譜，與Danielle、馬詩慧和樂基兒等名模齊齊公開私房煮食心得，「我貢獻咗一個Madeleine、一個煮帶子嘅食譜，都係法國菜。遲啲都好想自己出食譜，it's a small dream。」愛入廚的Amanda曾到法國藍帶廚藝學院學藝，又曾在四季酒店做學徒半年，學海無涯，她還會四處去上堂，「近呢年半返法國、去英國旅行，會睇吓有冇one day course，學吓煮海鮮。」入廚多年的她更愛儲特別廚具，「之前去紐約知道有個人專造copper pot，整到個蓋好靚，我特登去搵佢個workshop去買個煲。」

離婚後，Amanda遇上現任外籍男友Sam，二人最近更公開出席時尚場合，往往被追問到會否再婚，Amanda遲疑片刻，小心翼翼道：「我都係離婚冇幾耐，三年前先離婚，仲需要時間，始終都同前夫一齊十一年，要慢慢嚟。」要徹底走出上一段婚姻的陰霾顯然不是易事，再投入婚姻不是她唯一的目的地，「𠵱家女人有好多選擇，如果（婚姻）唔work，it's fine，你唔想再結婚都冇問題，五十年前你三十幾歲未結婚好大鑊，我好開心我可以有咁多選擇，冇壓力。」再婚要三思，但她看待愛情沒保留，「當你愛一個人就會兩隻腳跳入去，唔好諗咁多。人人都需要安全感，有時安全感可能冇咁多，但你會克服到，然後你會更strong。」

更多精采時尚內容，盡在 http://add.appledaily.com 。