醜婦終須見家翁!8號仔買家番薯梁前日終於將財團名單開估,結果,超人真係瞓身參與,喺荷包攞40億畀第3個仔(佢個慈善基金)買第2個仔(小小超)啲電盈股份之餘,仲幫番薯畀少少,而8號仔第二大股東網通亦唔輸蝕,請槍搵西班牙佬代買8%,諗住唔覺唔覺為自己(其實即係阿爺)完全染紅8號仔鋪路,對於呢個充滿父愛同埋咁有政治色彩的金鋼組合,想為小股東做啲嘢的二少未有意見,反而立會辣妹劉慧卿就好火滾!
卿姐話,暑假嗰陣二少諗住賣畀出到好價嘅麥格理或者新橋,但網通發爛渣唔准「香港人管理」嘅8號仔落入外資手中,仲要搵新華社幫佢出稿,出口術兼出手,但一個屈尾十,買家名單上面就有西班牙電訊同佢自己呢兩件唔係香港人嘅「外資」,咁即係阿爺只准二少賣畀佢哋鍾意嘅外資啦,成件事凸顯咗咩?咪中央點介入香港嘅商業行為囉!最慘係班小股東,當初仲以為有好消息,𠵱家就算二少拎13.8億出嚟派息都補唔番!