多得《我是歌手2》,令G.E.M.(鄧紫棋)喺內地人氣爆紅,微博粉絲人數由幾個月前嘅百幾萬,已怒升至近日逾千萬粉絲,非常厲害。G.E.M.仲食住個勢,舉行世界巡迴演唱會。
今日G.E.M.出席喺北京JW萬豪酒店舉行嘅「G.E.M.XXXLIVE」世界巡迴演唱會新聞發佈會,吸引近百傳媒採訪,亦有半百粉絲撐場。
G.E.M.將於5月17日假北京萬事達中心(原五棵松體育館),舉行北京處女個唱,除咗北京外,其他世界巡唱地區包括14個大陸城市,包括上海、天津、深圳等地,而12個國外地區,則包括英國、加拿大、紐約及馬來西亞等等。
G.E.M.以一頭紅髮、身穿白色露腰連身裙,化身「立白G.E.M.」亮相,活動開始時佢就高歌《泡沫》,會上播放張宇、曹格、韓磊、茜拉祝賀片段,張宇仲笑言:「竟然兒媳婦都不請公公做嘉賓,但祝大賣。」
G.E.M.喺台上以國語表示:「很開心,跟他們一起生活了幾個月,大家建立了非常親密關係,完了《我是歌手2》很不捨,覺得未來人生充滿挑戰,需要動力的時候,就會想起他們的溫暖。」
現場G.E.M.同師傅表現吹糖──馬形糖,呢款糖係老北京傳統小食,用嚟送畀粉絲;另外,G.E.M.宣布將喺網上舉行選拔,邀請歌迷做合唱團:「自己曾在北京後海做街頭演唱,給我很多歡樂。」
破冰儀式舉行後,G.E.M.落台時歌迷唱咗幾句《喜歡你》。現場有內地傳媒提到林宥嘉名字時,工作人員即搶咪,G.E.M.喺台上只笑咗一笑。