慧妍雅集會長劉倩婷、楊卓娜同快9歲嘅囡囡楊舒然今日喺鑽石山出席「飛閱童書大視界嘉年華」，劉倩婷透露慧妍雅集將捐出100萬元支持呢個活動。講到兩歲大嘅囡囡，劉倩婷指囡囡鍾意睇書：「書多過玩具，爹哋負責中文，我負責英文，每日要聽一個鐘故事先瞓。」提到好友李姿敏陀B，搵佢老公李丞責改名，劉倩婷話：「係呀，佢陀得幾靚，見到佢會搓佢個肚，越嚟越大，佢好興奮，因為係第一胎，佢係恨生仔，但o依家未知仔定女，到時生就有驚喜，佢老公姓賀，有啲難度，慢慢改，改個好名，等佢生多幾個。」

至於楊卓娜嘅囡囡楊舒然表示最鍾意睇漫畫同故事書，仲會畫畫、聽歌同彈琴，雖然看似文靜，但佢都會玩跳繩同溜冰。問佢長大後想做咩？楊舒然表示想做時裝設計師，但對做童星就冇興趣，楊卓娜話：「佢對着衫好有主見，我買衫畀佢，佢會話唔好買。」楊舒然即刻話：「因為衣櫃冇位。」

精選娛聞，喺晒《娛果》
http://fb.com/appledailyent