日圓係咁跌,唔少香港人都選擇去日本掃貨,不過唔少人去完返來都話,去到又遇到唔少內地人,唔多唔少影響心情。
早前日本公佈,去年中國遊客急增,按年大升83%至二百四十一萬人次,佔總旅客人數18%。每五個遊客就有一個係中國人,數目咁龐大自然又會製造一些中國奇蹟!有報道話,唔少內地旅客去到日本,竟然走去搶買馬桶,即係嗰隻殺菌、除臭、加熱、沖洗等多功能嘅馬桶,甚至有人一買買幾個。
唔係日圓跌,都唔知中國人對馬桶原來係充滿熱情。講真,中國泱泱大國,難道就冇廠商賣呢隻馬桶嗎?冇咪淘寶買囉。說穿了就係信唔過中國製造,難為馬雲仲夠膽講淘寶冇賣假貨。中國人唔敢用國貨是國恥,但一間上市巨企主席,擘大眼講大話,這何嘗不是國恥。
東瀛遊(6882)呢兩日終於起動。公司主打日本團,自然係日圓跌受惠股。公司管理出名好,已令人對公司加分。集資所得用來提升電話中心、網站、支付系統,於網上旅遊市場爭一席位,目前正慢慢打開內地市場。呢隻半新股1.39元上市,最近打破橫行格局炒高。首先現時市場要收嘅都收齊貨,第二日圓跌有利公司增加收入,第三就快新年假,現在唔炒還待何時?
Fifi
http://www.facebook.com/lovefrystock
本欄逢周二、四刊出