昨日好淡雙方嘅攻防戰打得好燦爛，好友早段挾上，恒指最高升上19131，但係淡友冇投降，掉頭反攻，恒指更一度倒跌，指數反反覆覆以19026收市，升咗82點，爭持有幾激烈？睇吓現貨有583億元成交就知道，唔好忘記之前兩日嘅成交都係好細。
恒指大成交支持下升咗82點，大局有冇變？基本上冇，因為指數仲係喺阻力水平。不過，昨日嘅對攻就反映咗好淡雙方都好想喺呢個時候搞掂對方，開展一個單邊市況，昨日大家都唔成功，年結又逐漸逼近，為怕夜長夢多，睇嚟腥風血雨嘅場面仲會繼續出現。
其實昨日嘅大成交互撼場面，多多少少都同滙控（005）有關，前日個市大幅攀升，淡友本來都係以守為攻，點知倫敦市滙控被人質低4元，話擔心佢嘅業務前景，班淡友忽然間感受到上天眷顧，昨日點會唔大舉反攻？好友前日掃得好哋哋，冇辦法唔繼續掃，於是乎一場可能毫無準備嘅惡鬥就開始咗嘞，睇個勢滙控仍然會有沽壓，只不過滙控喺恒指嘅影響力已被「攤薄」，大家估指數升跌，就要睇多幾瓣。

和黃C輪9742：和黃（013）昨日報收75.1元，升2.6%，係大市上升嘅功臣，國內3G市場嘅發展將有突破，啲所謂「3G股」隻隻炒上，和黃又點會冇追捧？股價早排升咗上75.9元就跌番落嚟，不過試咗兩次250日線炒番上去，昨日嘅成交有成26.4億元，技術指標全面強勢，破位推向80元應冇問題，破位就睇83元。和黃C輪9742昨收58仙，槓桿率12.9倍（有效10.2倍），對沖值0.78，正股升上80同83元，9742應該喺98仙同埋1.25元樓上，現價買入，正股跌穿73元止蝕。
俊樺