香港回歸咗八年，年年七月一日都會宣布授勳名單，今年都唔例外，共有二百七十三人得獎，不過，奇怪嘅係，一向自命係執政聯盟嘅自由黨就冇乜人喺名單之上。
自由黨主席田北俊當時都被人問到相關問題，佢答得好體面，話自由黨內多為工商界人士，呢班人一早就攞咗好多勳章，所以今次榜上無名都唔出奇，冇乜特別啫。
不過，八方聽聞，田少雖然講得咁大聲，但係成個自由黨都起晒哄，四處打聽發生咗乜嘢事？莫非煲呔真係咁記仇，田少年初接受《信報》訪問公開鬧咗佢幾嘴，就懷恨在心，畀隻零雞蛋佢哋食。
當然有心水清嘅人就話，自由黨眼大睇過龍啫，排頭位攞大紫荊勳章嘅劉皇發咪係自由黨囉，其他金銀銅紫荊勳章冇都算啦，問題係就算田少肯計入自由黨數，人哋鄉議局都唔會睬你。

煲呔要識做派糖仔

再者，講到尾，特區政府都唔應該咁孤寒，自由黨只有一個發叔入圍，其他連地區人士都全部交白卷；而民建聯就有馬力、陳鑑林、朱幼麟、尹才榜、何秀武、龍瑞卿等等；泛聯盟有呂明華；連新論壇都有吳清輝，民主黨都有羅致光，咁算點先？
田少當然唔會就咁算數，八方亦好奇去追問，原來今年真係好特別，皆因煲呔由三月起一人戴兩頂帽，又係CE，又係CS，所以授勳委員會改由FS、即係唐唐做主席。
如此一來，就真係審死官，究竟係下面冇人提自由黨人嘅名上委員會；抑話係唐唐避嫌，唔畀自由黨人士攞獎；抑話煲呔最後把關玩嘢，真係冇人知。
講到呢度，大家都怕且明白田少點解冇大吵大鬧煲呔一番，因為成件事係經唐唐手嘅。
八方聽聞，新政府喺公布名單之後都覺得好唔妥，因為實在唔係幾好。嗱，既然曾許唐知衰，就應該要𠱁番田少啦。係人都知，田少係生意人，唔會太小器，只要畀番粒糖仔就掂。
田少同八方講過，佢最想自由黨係喺行會有兩個代表，煲呔一定知點做，問題係北京肯唔肯啫。


爆料熱線：29290000、27860099
報料傳真：26239278
報料電郵：[email protected]