文千歲40年前慘累梁少芯變第三者 婚後移民美國跟前妻做鄰居
蘋果日報 2020/12/26 17:54
文千歲梁少芯舊日的足跡陳奕迅車淑梅
資料圖片
著名粵劇老倌文千歲（原名黃富華，人稱華哥）與太太梁少芯（芯姐）移居美國洛杉磯近10年，本來打算上月回港參加姨甥女鄧美玲的婚宴，可惜因武漢肺炎疫情影響而未能成行。夫婦倆日前越洋接受港台《舊日的足跡》節目主持車淑梅訪問，分享執子之手近40年的甜蜜婚姻生活。
40年前，華哥向芯姐展開追求，女方被外人誤會是第三者，華哥解釋:「我第一段婚姻唔超過6年，後來遇上芯姐，佢好叻女做戲好，又照顧得我好，我係出名『裙腳仔』，媽媽寵壞我，我希望佢（芯姐）一直照顧我，我哋有信心堅持落去先來到今日。我欣賞佢做家務頂呱呱，而家美國成間屋都係佢統籌晒，真係睇唔出呀!」
芯姐憶述當年是天意安排令她與華哥合作:「華哥答應演出嘅唯一條件，就係要同我做知己，嚇咗我一跳。其實我父母唔喜歡佢，我都唔鍾意佢囂張嘅性格，後來我哋結婚，行內人同戲迷都唔接受我，對我嘅閒言閒語足足10年，都好難受，我要用行動去話畀佢哋知，我係一個點樣嘅人。華哥係好丈夫，我被佢嘅正直所感動。感謝主，華哥跟我信基督教之後，連打爛櫃嘅暴躁脾氣都改變咗。我哋結婚接近40年，互相嘅仔女，甚至佢嘅前妻都安排移民咗去美國，大家住喺附近，一家人樂也融融就係人生所追求，簡單就係福氣。」
年屆82歲的文千歲從6歲入行，10年前宣佈退休，他直言:「我睇通舞台好現實，我呢個年紀喺台上演出，台下啲人會評頭品足，話我個面皺皮，啲粉跌落嚟，幾落力都冇用，我唔想被批判。」老行尊深感要退位讓賢，他對曾合作過的樂壇後輩讚口不絕:「諗起嗰次教容祖兒、陳奕迅演出《魂魄唔齊》，呢對天王天后係聰明仔聰明女，好快上手，好客氣『師傅前師傳後』，好乖。後來陳奕迅開紅館演唱會都送飛畀我哋，佢哋處世態度、工作認真好值得敬佩。」文千歲除是大老棺外，早年更拍過不少麗的經典劇集，包括《變色龍》、《天蠶變》、《大地恩情》等等，更曾主唱麗的劇集《十大刺客》等受歡迎主題曲。
粵劇老倌文千歲夫婦退休近10年。（資料圖片）
陳奕迅曾拜師跟千文歲夫婦學粵劇。（資料圖片）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！