下個星期就聖誕節，又係香港藝人出動搵真銀嘅時候，今年香港經濟好，無論係品牌或者商場宣傳都肯使錢，藝人本應豬籠入水，可惜係呢兩年喺香港有人氣嘅，好多都係台灣偶像，好似之前嘅棒棒堂同黑澀會美眉咁，佢哋喺香港fans多、氣勢勁，所以唔少客戶開始轉向佢哋打主意，巿場難免被分薄。

任勞任怨

呢個聖誕節，台灣人氣組合黑澀會嘅八位青春少艾、有偶像劇王子之稱嘅台灣小生唐禹哲、憑《惡作劇之吻》紅遍中港台嘅鄭元暢都會殺到，佢哋分別會幫觀塘apm、大埔超級城、元朗廣場同將軍澳新都城做聖誕活動，聖誕嗰幾日，大家日日都會見到佢哋。
馮仁昭八過，其實請台灣藝人過嚟香港皮費好重，好似黑澀會咁，連埋經理人、助手、化妝師成20個人，又要住五星酒店，加埋機票嘅支出都好犀利，同請香港藝人嘅價錢差好遠，不過佢哋接得個job就好合作，叫佢哋做乜都肯配合，唔似得某啲香港藝人呢樣唔得嗰樣唔肯，加上人氣旺，傳媒都以大篇幅報道，所以好多客戶寧願畀多啲錢，請班過江龍嚟宣傳。